يامهزبة !!
البنت الأسبانية تتميز عن بنات العالم كله بأنها عند الدراما و الزعل تستطيع انها تأكل و هي تبكي!!!
خصوصا البنت الحرجانة من عند جوزها
ادق الباب و معها شنطتها .. خوها الصغير يفتح الباب ،، امه تقوله : من اللي جاء ؟؟؟!
يقوللها ههههههه ،، هاذي كريستينا معاها شنطة هدايا .
كريستينا ادفه و تخش .. تقولوه هذي شنطة دبشي.
امها بتغص وهي تاكل بامية و رز ،، وتقول يا ساتر ، تخش كريستينا تعزق الشنطه ع جنب ، و بتقعد عند الاكل ،، مبدئيا ما بتوكل.. تسلح الحجاب و تعزقه ع جنب ، تبدا تبكي و تحكي كلام مش مفهوم !
الحيوان التافه الحقير ضربني عشان اخته الكلبه!!!
امها تقولها شنو؟!
ترد: ماما فوتيني والله مش قادره نحكي ، معش نبيه .. معش نبيه .. معش نبيه .. خطووووني!!
خوها الصغير بقوللها تستاهلي هههههه !
ترد : يمي سكتي ولدط خير مانقتله !
رد خوها : هههه سكري فمك يا مهزبة !!
بترد : يميييييييي !!
الام تقول : انتا اسكتو وامشي شوف تنك المية اذا يعبي او لا وهنعطيك جنيه !!
يمشي خوها يجري للسطاح ، وهو طالع بقول : هاهاها يا مهزبة !!
كريستينا تمسك حبة فلفل حلوه عن الاكل ، و تبدا تقرش فيها و دموعها بتنزل !!
وهي تاكل تقول : مسويه؟!
امها تقوللها: شن صاير يامصيبة !!
ترد : يمي سيبيني ف حالي وراس بوكي ، وتعزق حبة الفلفل !!
امها : باهي كولي شئ حاجة !
ترد كريستينا بس تمسك المعلقه : والله ما جاي عبالي اشي نكد عليي الله ينكد ع عيشتو !!
و تبدا تاكل و تحكي و تبكي ، ماسكه الكاشيك بيد و الخبزة بيد ، و ف كل كشيك رز تنزل دمعة
امها : نحطلك اخرى ؟!
بترد : لا منبيش شئ !!
وتكمل اكل و كلام مش مفهوم !!
يجي خوها الصغير من السطاح : كيف تجي تاكلي وتبكي يا مهزبة !!
هنا كريستينا تعزق عليه الكاشيك و يطير منها رز عالمكان كله ، يهرب خوها و الكاشيك يخبط فالساس ويعلم الرز ع الساس!!
تلاحظ ان امها بدا يرقالها ، تصبي تجربي و تمسح الرز بحجابها اللي سلحاته
امها تقوللها : حجابك جديد جايبه لك راجلك !
ترد : ف عينه .. هذا من راتبي !!
يرن موبايل كريستينا ،، تشوف الجهاز يطلع رقم راجلها ،، تاخذ التلفون وتمشي تجري للدار ،، صوت عياط وسب وتكسير ، تطلع مبتسمة !!
امها : من ؟!
بتقولها : هذا راجلي!
امها : مهو قبل شوي كان حقير !!
بترد : يمي كيف دايرتها البامية هكي .. نبي ندير زيها ، الرة اللي فاتت طلعت مشيطة !!
تعليقات
إرسال تعليق