فوتونا الزح


زمان اذا تعرفت على شخص جديد ..
تتعرفوا على بعضكم لما يسألك انت ولد من ، ووين تسكن ، واذا يقربلك الشخص الفلاني ، ووين تقرأ ، واذا كان في أستاذ او دكتور يقربلك فالجامعة ، واذا عندك عمك او خالك يقرأ برا البلاد..

الايام هذه صار التعارف غريب .. الاسئلة عبارة عن خيارات بين اسمين ، وعلى حسب اجابتك يحدد انت شنو .. الاسئلة صارت تحسسك ان العالم مقسوم نصين:
انت ليبي ليبي ولا مخلط؟
انت اصلك من وين؟
باهي بوك مواليد اى مدينة؟
انت مع حفتر ولا مع الدواعش؟
انت مع بشار الاسد ولا مع الجيش الحر؟
انت سيسي ولا مرسي؟
انت يمين ولا يسار؟
انت لاجئ ولا نازح؟
انت مع فتح ولا حماس؟
انت ابيض او اسود؟
انت برشلونة ولا مدريد؟
انت معاك ايفون ولا سامسونج؟
انت 092 ولا 091 ؟
انت ذكر ولا انثى ولا قوس قزح؟

ومن خلال اجاباتك يحدد وضعك .. ومستقبلك .. وميولك .. واذا انت بتخش للجنة ولا النار!!
ولما يبي يتناقش معاك يقولك: اصلا نحن شن اللي دمرنا غير الجهوية والعنصرية؟؟!!
لا والله ياغالي مفيش حد دمرنا غيرك!!
ياسي سيبونا في حالنا واطلعوا من جو الامتحانات .. نحن بني ادمين .. مش ناقص الا تقول انت صناعة اى دولة؟؟

المشاركات الشائعة من هذه المدونة

جديد الجوكر .. و الأغنية دي حرام (Remix)

حقيقة نتيجة 11-1 #ريال_مدريد_برشلونة !!