الإهتمام مش بالشحتة !!

من غير مقدمات هى كم كلمة خوذوها وخلوها ديما في بالكم ...

اللي يبي يسأل عليك يسأل .. حتى لو طلعله مليون موضوع!!

قصة مشغول انسوها .. رسالة فيها كلمتين متأثرش على اى شخص مهما كان حجم الشغل اللي فيه .. حتى لو انه مشغول بمفاعل نووي وقاعد يخصب في اليورانيوم دقيقة يكتب كلمتين وانتهى الموضوع !!

علشان هكي متقعدوش ترجوا من اى شخص انه يسأل .. ومتبقوش تبعتوا في رسائل .. وماترنوش واجد .. ابعت مسج او اثنين .. ورن عليه رنة او رنتين !! غير هكي انسو .. اكيد هيشوف موبايله .. مفيش حد ينشغل عن موبايله .. اذا شاف رنتك ( ويبي يرن عليك ) هيرن عليك .. ويسأل ويقدر إن في شخص فاقده .

غير هكي لا .. واذا بعد شهر شهرين .. شاف نفسه فاضي .. ودزلك رسالة .. مش تنهبل وترد عليه عادي!!!

بالعكس .. سكر الرسالة ولا كأنك شفت شئ .

صار مفيش أسهل من كلمة ( والله مشغول الايام هذي )

تي بشن مشغول يامقمل !؟ تي رئيس الوزراء فاضي!!

هو السؤال او المكالمة تبي وقت !؟ دقيقة بالكثيرة مستحيل تعطلك عن اجزاء الذرة اللي قاعد تحلل فيها يانيوتن المشغول!!

الحجج الاكثر استخداما الايام هذي :

1- والله عندي امتحان .. ( عادي ابعت مسج وانساه .. ما انت قاعد تنزل في صور على الانستقرام وتصور في السناب شات وجوك مليح ) .

2- عمي مروح من تونس .. ( خف علينا يا ابو عيله .. حسستني ان اذا عمك شافك ماسك موبايلك هيتبرى من ابوك ) .

3- شغل لفوق راسي!! .. ( ماشي ياوزير .. يامدير .. يابروفيسور .. يا استاذ الجامعه .. اما تنشغل بموبايلك وتكسد على تويتر في نص الليل عادي ) .

4- حاب نبقى بروحي الفترة هذي !! .. ( خف علينا يادراما .. يانفسية .. يا انطوائي .. ياهتلر ) .

بالمختصر المفيد .. القصة مش انه مشغول .. القصة ان لكل شئ أولويات ...

يعني اذا في حد أهم منك .. أنت هتبقى في أخر القائمة ...

أنا اللي شايفه إن الناس قعدوا يملوا من بعض!! أصحاب أو علاقة قديمة قعدت تمللهم .. قعد كل شخص يدور على أشياء أهم .. وناس أحسن !!