التطوع في الوقت الحالي
في وظيفة جديدة اسمها ( متطوع ) تعرفوها ؟؟!
تعرفوا شن يعنى متطوع ؟ او متطوعين؟!
هذوم جماعة من الشباب والبنات يقدموا في اعمال خيرية .. ومساعدات للفقراء والايتام !!
بس ما يقدروش يديروا الخير بدون ماتنتشر القصة .. لازم من صفحة على الفيس بوك .. مع تصوير والكل يعرف ،، تعالوا شوفوني كيف انا متطوع ،، صوروني وانا ( متضبط ) يتيم ،، سيلفي وانا نتبرع .. صورة لاني نرسم في ابتسامة على وجه فقير!!
توا هكي صارت الزكاة والمساعده ؟!
مش المفروض لاتعلم يسارك مافعلت يمينك؟!
ولا تبو تقولوا لنشر الخير وعلشان الناس تعرف وتتوجه عالخير!!
هى الناس ماتعرفش انها لازم ادير خير؟! ولا تراجي الصور من الفيس بوك ؟! يراجوا منكم يعرفوا وين في فقراء؟! مهو نص الشعب فقير .. القصة ابسط من البساطة !!
ياجماعة والله في قصة صارت قدامي .. جماعة من المتطوعين اشترطوا على عائلة فقيرة انهم اذا تبو مساعدات لازم نصوروكم !!
هو انتو تحسابوا الفقير ماعنداش كرامة؟! ولا الولد اليتيم ماعنداش عزة نفس؟!!!!
وين التطوع بالموضوع ؟! انتو بس تطلعوا علشان التصوير؟؟
ولا الموضوع اووووه شوفوا الشاب هذا يقدم في كل مساعدة يقدر عليها .. والبنت ماشاء الله عليها ، طول النهار ترسم بسمه على وجوه الاطفال!!
باهي .. جربوا ساعدوا طفل بدون ماتصوروه !! تقدروا عليها ولا لا ؟!
الايام هذي صار في اعلانات لعمل الخير !
يعني الناس ناسيين ان في شئ اسمه عمل خير؟ خليكم لموا تبرعات واشروا ( تيشرتات ) نفس اللون مع ( طاقيات ) باسم المجموعه والبسوهن .. وكاميراتكم معاكم .. ويلا نتطوع !! يلا خلونا نوري الناس ان نحن قاعدين نتطوع !!
تي في ناس كافلين ايتام .. ومش حاكيين لعائلاتهم عالموضوع !!
تعالوا صوروني وانا نكفل اليتيم يلا!!
يلا لايكات للشاب اللي كفل يتيم .. وصورة لليتيم قبل الكفالة زعلان .. وبعد الكفالة فرحان!!
اذا استمر الوضع هذا هيصير في ( check in ) للتطوع ..
انا نحكي من وجهة نظري ونقول ان التطوع و المساعدة مش هكي .. انا متأكد ان نص اللي في الصور ميبوش يصوروا!!
وتوا هينطوا جماعة الدراما الفكرية المتقدمة ويقولوا : "نحن نريد ان ندل الناس على فعل الخير" !!
ياخوي انت تبي تدل الناس ، وتذل اللي ساعدته!!
ليش هو زمان كان في فيس بوك ؟! علشان الناس تعرف ان في عمل خير!!
ولا قعدتوا زى المسؤولين ؟ صورني وانا قاعد نبرم على المدارس ايام الامتحانات ، صوروني وانا ماشي للجبهة ونبرم على المحاور !!
انا متأكد ان في نسبة من المتطوعين .. مستحيل يطلعوا يتطوعوا بدون كاميرات!!
تي خاطونا الزفت يالصقة ...
ملاحظة : الكلام اللي قلته فوق مش عالكل .. نتكلم ع اللي يطلعوا بالكاميرات.
تعليقات
إرسال تعليق